Tarapur News Today
તારાપુર તાલુકાના ૭ જેટલા ગામોમાં પાણી ધીમે ધીમે ઓસરવા લાગ્યા છે. જોકે ચીતરવાડા ગામમાં હજુ કેડસમા પાણી ભરાયેલા છે. વીજ પુરવઠો છેલ્લા બે દિવસથી બંધ હોવાથી ગામલોકો ભારે હાલાકી અનુભવી રહ્યા છે.
સાબરમતી નદીમાં ૨૦ હજાર ક્યુસેક પાણી છોડાયું
ગતરોજ સાબરમતી નદીમાં પાણી છોડાતા તારાપુર તાલુકાના નદી કિનારા પર આવેલા નભોઈ, રિંઝા, ફતેપુરા, કલોદરા, ખડા, પચેગામ સહિતના ગામોમાં પાણી ઘૂસ્યા હતા. આજે સવારે ૯ વાગ્યાથી પાણી ધીમે ધીમે ઓસરવા લાગ્યું છે.
સોમવારે સવારે ૧૧ વાગ્યે વાસણા બેરેજમાંથી ૫૬ હજાર ક્યુસેક પાણી છોડવામાં આવ્યું હતું, જે આજે ઘટાડીને ૨૦ હજાર ક્યુસેક કરવામાં આવ્યું છે. પાણીમાં ઘટાડો થતાં ગામોમાં ભરાયેલા પાણી એક ફૂટ જેટલા ઉતર્યા છે.
ચીતરવાડા ગામનું દ્રશ્ય
ગામને જોડતા માર્ગો પર નદીનું પાણી ફરી વળ્યું હતું. ગામના ટાંકી ફળિયું, વણકર વાસ અને ભરવાડ વાસ વિસ્તારોમાં છાતી જેટલું પાણી ભરાયું હતું. ગામમાં પાંચ ફૂટ જેટલું પાણી ભરાતા લોકો હાલાકી ભોગવી રહ્યા છે.
રસ્તાઓ પર પાણી ભરાવાથી ગામમાં પહોંચવાનો એકમાત્ર રસ્તો ટ્રેક્ટર રહ્યો હતો, જેના માધ્યમથી વહીવટી તંત્ર આજે ગામ સુધી પહોંચ્યું હતું.
આરોગ્ય વિભાગની કામગીરી
વીજળી ન હોવાથી મુશ્કેલીઓ વધી છે. આરોગ્ય વિભાગે તાત્કાલિક પગલાં લીધા છે –
- એમ્બ્યુલન્સમાં ઓપીડી સેવા શરૂ કરી
- ક્લોરિન ટેબ્લેટ અને ઓઆરએસ વિતરણ
- પોરા નાશક કામગીરી હાથ ધરાઈ
પાણી પૂરું ઓસર્યા બાદ ગામોમાં સફાઈ, સર્વે અને પાવડર છંટકાવ કરવામાં આવશે.
ડાંગરના પાક પર ખતરો
તારાપુર તાલુકાના નદી કિનારા પર આવેલા નભોઈ, રિંઝા, ફતેપુરા, કલોદરા, ખડા, પચેગામ અને દુઘારી ગામોમાં નદીનું પાણી ફરી વળતા હજારો વિઘા જમીનમાં રોપાયેલ ડાંગરનો પાક નિષ્ફળ જવાની ભીતિ ખેડૂતોમાં છે.
